Lächerbrout (Focaccia)

ZOUBEREEDUNG

• Schëtt d’Miel op d’Aarbechtsfläch a maach e grousst Lach an d’Mëtt.
• Schëtt d’Hallschent vum Waasser an d’Mëtt (dat gesäit dann sou aus wéi e Séi).
• Zergrimmel d’Hief mat de Fangeren a stree se an de Séi (an d’Waasser). Gëff och den Zocker an d’Salz dobäi.
• Huel eng Forschett a réier lues am Waasser bis d’Hief, d’Salz an den Zocker sech ganz opgeléist hunn. De Séi ass da ganz hellbrong. 
• Réier lo mat der Forschett ëmmer méi Miel an de Séi (vun de Borde vum Séi an d’Waasser). 
• Wann an der Mëtt e richtege Bräi entstanen ass, kanns de nach de Rescht vum Waasser dobäi schëdden.
• Dann réiers de nees ëmmer e bësse Miel dobäi bis alles ganz bräieg ass.
• An lo verschaffs de de Rescht Miel am Deeg mat dengen 2 Hänn, bis de e richtegen Deeg hues. 
• Wann et pecht méchs de nach e bësse Miel op deng Hänn. Den Deeg ass prett wann en net méi pecht.
• Wann den Deeg fäerdeg ass muss en nach emol 5 Minutte gutt mat den Hänn duerchgekniet ginn. 
• Lo lees de den Deeg an eng Schossel a lees e groussen Teller op d’Schossel oder en Duch.
• Stell d’Schossel op eng Plaz wou keen Duerchzuch ass, am beschte wou et e bësse méi waarm ass (Heizung oder sou).
• Den Deeg muss elo ongeféier 30 Minutten opgoen, bis en sech an der Gréisst verduebelt huet. 
• Lo muss d’Loft nees aus dem Deeg eraus. Du kanns den Deeg gutt mat de Fanger zesummen drécke bis d’Loft eraus ass an d’Boule Deeg nees méi kleng ass.
• Maach de Bakuewen un op 220 °C (Ober- und Unterhitze).
• Ueleg de Bakblech mat 1 Iessläffel Olivenueleg an engem Pinsel an.  
• Stree e bësse Miel op d’Aarbechtsfläch a rull den Deeg zu engem Rechteck aus.
  Lee den Deeg op de Bakblech an zéi en ausernee bis en an d’Form passt.
• Buer lo mat dengem Fanger lauter Lächer an den Deeg, wat méi, wat besser.
• Lo kanns de lauter Saachen an d’Lächer stiechen déi’s du gären hues: Tomatenstécker, Tomates cerises, gedréchent Tomaten, Stécker Knuewelek, Stécker Zwiwwelen, Oliven, Basilikum, Rosmarin, Salbei, Thymian, Kéis …
• Schmier nach mam Pinsel eng Couche Olivenueleg op den Deeg (ouni ze fest ze drécken) a stree nach e bësse grafft Salz driwwer (net ze vill).
• Looss d’Focaccia nach emol 30 Minutten opgoe bis de Volumen sech verduebelt huet.
• Lo muss d’Focaccia nach fir ongeféier 25 Minutten an de Schäffche bis se eng hellbrong Kuuscht huet.
  
  D’Juju an de Filou 👩‍🍳🧑‍🍳 wënschen iech e gudden Appetit 😋!